Dagaaba Bal Ane Ba Yiiluŋ, Doma, Dannoo Naŋ Kyaare Ne (Kawazu)

Dagaaba Bal ane ba Yiiluŋ, doma, dannoo; Bal zaa ne o dannoo ane ba kyiiruŋ, zenziiri ane ba biyoe, tebɛ bee ŋmemɛ te Dagaaba lankpeɛbo poɔ.

Nɔ-iraa

Bagaaba lankpeɛbo poɔ ba taa la bal bee yiiluŋ naŋ tuuro saa pare. Bal bee yiiluŋ e la noba bee boora mine naŋ yi sããkompare bonyeni; Bal bee yiiluŋ deme maŋ laŋe la doma, kyiire, dannoo, teŋgan-ŋmene, pɔgeya-yoe ane yo-segɛ.

Aseŋ; Doma e la doŋa, bonvuuraa bee nuulee boora kaŋa bal noba naŋ bo ka ona la daŋe faa ba sããkoma nyɔvore, ka ba pare ba pɔge. N sããkompare bal e la “Seebilee” ka ba doma e “Kyeɛ” bonne na vɛŋ ka ba doma e kyeɛ la ka teŋkore saŋa la ka te sããkoma da bore kpɛ mɔɔ poɔ a te nyɛ bɔgo a kpɛ be a te bebe ka dayuo wa ga a bɔgo pɔge ka a da  kyɛrɛɛ fēē ka o na naŋ kpi a bɔgo poɔ ka kyeɛ meŋ wa vara o bɔgo a te yi o zu, ka o wa yi a gaa yiri wa yele ka kyeɛ la faao a zuiŋ kyeɛ e la ba neɛ, ba bal sããkompare zaa naŋ e seebilee ba ɔɔra kyeɛ bonso o naŋ la da faa o nyɔvore.

A yi a lɛ puoriŋ sããkompare kyiiruŋ la pɔge seɛ, ka pɔge wa taa seɛ o ba zenne kogi zu bee a maala diibu bee bondirii bee gɛrɛ weɛ, ka ona wa zagere kyɛ de tonne ne toma, ana zaa o maŋ so la a seɛ faaŋ. A yidandɔɔ la maŋ nyɔge o ne tampeɛloŋ ka o pãã baŋ so o meŋɛ bee a seɛ naŋ.

A kaŋa meŋ la ba zeŋ ziiri, N sããkompare da zeŋɛ la teŋɛ kaŋa ba naŋ boɔla “Tuusãã” ka kɔzirii waa tuo ka ba iri gaa teŋɛ kaŋa ba naŋ boɔla “Kawuzu” a maŋ te kɔ ba bonkoɔre a paale zie zaa ka ba maŋ di faaŋ kyɛ kɔge ne zu ka ba yele ka a teŋɛ yuori la Kawuzu bonso ka a be la ka ba kɔ nyɛ bondirii, a maŋ di bondirii kpaa kyɛ kɔge ne ba zuri, kyɛ pampana ba maŋ tage ŋmaa a boɔlo ka “Kawu” kyɛ a zaa bonyeni la, Kawu la kpɛ a gama poɔ kyɛ a yuori e la “Kawuzu”.

Bal yoe; bal zaa maŋ taa la ba biyoe aseŋ, Seebilee saakompare bal yoe mine la a ama naŋ tu, Irre-irena, Meɛfrena,Tuboona, ane a mine kaŋa.

Seebilee saakompare bal dannoo , bal zaa maŋ taa la ba dannoo ana la maŋ wullo ba gandaaloŋ bee yelyeli kaŋa na kyaare a bal na tenzenne,doma,Seebilee bal dannoo la, Bompore wuuroo yideme ama kyɛne ka neɛ zaa gogerɔ o zu. Seebilee gandaaloŋ dannoo la lɛ.

Abaaraa zaa seebilee sããkompare bal poɔ ba taa la tebɛ bee ŋmene naŋ so ba emmaaroŋ zu kaabo, ana na so seebilee zu kaabo la ama, kaare, dagile, Kɔlaa ane Maaseɛ.