Sori tuubu “Vɔlta Bakpoŋ” poɔ

Kuunyɛ, Naa beɛre, nyɛ la yuomo pie ne ayoɔbo. O seŋ la sori tuubu ŋaa. Yuoni ŋa poɔ, o dɔgreba toŋ o la o yoŋ Tamale poɔ. Kuunyɛ na gaa la o areba naŋ e polisi zie, Tamale poɔ.

Tuusidee 17.00

N be la Akosomboŋ. N be la a pantuu poɔ. A pantuu zo la ŋmenaa ne tensoga. Maa ne noba yaga la be a pantuu poɔ. N nyɛ la dagre yaga ka ba eŋ waare a poɔ. Lɔrbɛrɛ ayi meŋ are la a pantuu poɔ.

Tuusidee 20.00

N pantuu kyɛnɛ la baaloŋ baaloŋ. Kyuu puree la laratata lɛ. Bondi-koɔrebɔ die be la a pantuu poɔ ka noba maŋ da bondiraa na zaa ba naŋ boɔrɔ. N ba daara bonzaa bonso n poɔ pɛle la yaga ne a dakone na na makoma naŋ ko ma. Noba zeŋ gɔlle la tabolɔ, N teɛre ka ba boɔrɔ ka ba gaŋ a be. N boɔrɔ ka N gaŋ a waare dagre poɔ ne n bibil-taaba.

Wɛnɛsedee 10.00

Baguo ŋa, a pantuu are la tenne ata poɔ ane karakyi meŋ poɔ. Gboe ane zonnyɔgreba yaga be la a ziiri na zaa te naŋ are. A tenne ama zaa poɔ, pɔgeba maŋ kpɛ wa koɔre la bondirii, bonsuuri ane fantare ko a so-turibo. N da da la gyɛlɛ ata ane koɔ̃ karakyi poɔ.

Wɛnɛsedee 17.00

Te da ta la Yappei gbellianuu saŋa, a yi a pantuu poɔ. Noba yaga da boɔrɔ ka ba kpɛ a bɔɔsere kyɛ a da ba e yaga a na wuo ba zaa.

A da e la ferebo ka N kyɛlle fẽẽ. A baaraa zaa, N da nyɛ la bɔɔse gaa a Tamale. N da ta la n areba zie tensoge-ponsentaa.

N woŋ la noɔ a sori tuubu ŋa noɔ. N teɛre ka n dɔgreba na la ko ma la sori ka N tu sori.