Dagaaba Komaale

Dagaaba Komaale: ka kurkumo ba sentaa ka a gyamaa naa wa sennɛ taa, kyɛ tatenne kɔɔre anuu meŋ ba yi taa bonso lesiri ba yi taa. Bonso ka N yeli a lɛ? Ka fõõ sereŋ kaa Dagaweɛŋ naŋ gaŋ a lɛ, o ba waa wɛbilee ka te zaa yel-erre na baŋ yi taa kperaa lɛ. A koɔlɔ/teŋgbaŋ yoŋ yɛloŋ ane o wooruŋ zaa waa la 18, 476 sq. km yi a 1983 poɔ ba naŋ ŋmaa o. Ka a noba zaa naŋ be a Dagaweɛŋ gɛrɛ nga noba turi anaare ane kyɛlee ne bonyeni, dɔgle kɔɔre anuu ne ayi (901, 502 inhabitants) a are 2.4%, anga kɔɔre anuu zaa poɔ, yi a Ghana gɔmenɛnte nensɔrbɔ kpaaroo deme sɔroo [2021] poɔ. Te ganzanne-karegyuu kaŋa gba da vɛŋ ka te baŋ ka, ka fõõ na koɔle a Dagabiiri zaa naŋ yele Dagaare bee Dagara a be a Ghana gbandigeŋ laŋ ne a Faranse gaŋ zaa lantaa naŋ pɔge gaŋ ŋa turi anuu ne dɔgela (over 1,000,000 people). Ba Kpateɛ yeluu, ka ka fõõ wa vɔ guruu 'mushroom' fo mang wuli la taŋaseɛ, kyɛ bonoo zuiŋ, (kaa Ghana Statistical Service badɛr-miri zu a nyɛ). Fo na la baŋ kaa la Bodomo (1997: 1-2) peɛroo gane poɔ nyɛ ka maa wa ŋmaara zirii, fõõ ŋmɛ ma kyɛ nyɛb.

Kyɛ yeŋ la ka N yele a ama zaa yire ne, wuli ka a Dagaaba yeltuuri naŋ bebe a lɛ, a zaa naane yi taa: kuori la a kaŋa o yeltuuri tɛɛtɛɛ na maŋ sãã kpeɛraa lɛ. Aneŋ ka Dagaaba bee boorɔ zaa maalɛɛ kuori kyɛ tɛɛtɛɛloŋ fēē maŋ be be la a maaloo poɔ. Data Paul boorɔ mine aseŋ, kɔmparɛɛ Daga-yelbe (kaa Bodomo, 1989 peɛroo gane poɔ) aŋa, Kaleo paaloŋ zaa sigre gɛrɛ te nyɔge Wa ne o gbandigeŋ zaa maŋ koŋi la kuori ŭŭ a kŭŭ kyɛ naŋ biŋi bebiri wa maale a kuori. N teɛre ka bana ne Sesaal-paaloŋ noba zaa bonyeni la. Kyɛ a te kyɛlee na zaa meŋ naŋ kyɛre maŋ gbaŋgbõõ/nyage la a zaa taa ( a kono laŋ ne o maaloo zaa). Noba mine zoro la ba suuri kuori zie (ka gyeremɛ neɛ/nentegroŋ/bipɔleŋ wa kpi, a maŋ beɛrɛ la neɛzaa a vɛŋ ka ba koŋ o soba laŋ ne ŋmɛtaa zaa gba a kuori poɔ) kyɛ mine meŋ ba zoro. Ka ba mine taa ko-beɛre (a kŭŭ kommu daa na dare, a pɔgeyaare mang leɛ gaa la a te kpa laŋe kongi kyɛ paŋ a kŭŭ yaa.

Sɛre ka N na piili a yelyagsɛgraa ŋa, N na nyɔge o la poŋ eŋ wɛlmɛ wɛlmɛ bee ka yelzuri la, a yeli yɛlɛ fēē kyaare ne a yelzuri ama kaŋa zaa: Te na dang kaa la noba na naŋ la Dagaaba, bonso fo koŋ baŋ piili yele ba (Dagaaba) kuori maaloo yɛlɛ ka fo ba baŋ noba na naŋ la ba, a na waa ŋa paanaa bogi neɛ naŋ tuuro ne tulindaa na. Ayi soba; bone naŋ la kŭŭ Dagaaba teɛroŋ poɔ, bonso ka kŭŭ ba ko kuori koŋ maale, kyɛ bee zirii ka N ŋmaara? Ata soba; lɛ Dagaaba naŋ maŋ maale ba kuori (tɛɛtɛɛloŋ naŋ be banaŋ naŋ maŋ koŋi ba kuori baare kyɛ biŋi bebiri a la maale aneŋ banaŋ meŋ naŋ maŋ kono laŋ ne o maaloo zaa). A baaraa; bone naŋ so ka Dagaaba kono kuori ane o maaloo.

Kŭŭ la Boŋ Dagaaba Teɛroŋ poɔ

Dagaaba teɛroŋ poɔ kŭŭ la nensaala seɛ ane o eŋɛ naŋ wɛle taa. Ba sage la ka ka neɛ wa kpi o soba seɛ maŋ gaa la dapare, o saaŋkommine zie. Dagaaba ba sage di ka neɛ maŋ kpi la weɛlɛ; haali ko sobaŋ pãã nɔŋ o kore wola zaa te kpeɛrɛ bogi kyɛ kpi ba maŋ wuli ka yelfaa kaŋa la wane o soba kŭŭ. Ka fõõ ta Loraa-Bɛrwɔŋ sɛŋ ka neɛ wa kpi a be, ba ba kono o soba daadaa lɛ. Ba maŋ tuo la o soba ne sɛnlee kaŋa, a sɛnlee na la na wuli bone na kŭŭ naŋ ko o soba, a wuli be naŋ seŋ ka ba ŭŭ o soba. A sɛnlee na la na lɛ wuli ka ba koŋ o soba bee ba ta koŋ. Ka a soba wa waa soba, gbaŋgbaa, potuo-soba bee a di zēɛ o nyɔvore poɔ a kyɛ kpi, ba ba kono a kŭŭ ŋa tɔ. Ka fõõ meŋ leɛ ta Loraa-Tampeɛ, Baabili, Ɛremɔŋ ne ba taaba na zaa ka gbaŋgbaaŋ wa kpi ba ba kono, ba maŋ de o la te wɛre bagbɛr na poɔ kõɔ naŋ zoro tɔlɔ a kyɛ de ŭŭ a be. A ba e nɔkpeɛne ka Dagaaba ba deɛnɛ ne ba kŭŭ, ba nɔŋ la kŭŭ yɛlɛ. Azuiŋ ba da maŋ meele ne la kŭŭ lɛɛŋ te ta bebie awola mine kyɛ baŋ de te sɔgle. N nimiring la N saaŋkoma kanga poɔroŋ ba naŋ da biŋi beraata a da wa maale ka ba derɛ o wa baara ka a zu da ŋmaa le kyɛ ka a eŋ-nɛmɛ zaa da bɔrɔlere ka ba tuuro wuoro.

Sobie Na Kuu Naŋ Maŋ Tu Kyɛ Ko Neɛ

Sobiri na kŭŭ naŋ maŋ tu a kyɛ ko neɛ Dagayiriŋ poŋ eŋ la vori ata poɔ; te taa la ŋmen-kŭŭ, pĩĩ-kŭŭ ane yel-uraa kŭŭ. A yi a ama puoriŋ Dagaaba taa la kŭŭ parɛɛ ayi; kŭŭ-maaroŋ ane moɔ kŭŭ ( ka ba mine maŋ boɔle ka yoluŋ kŭŭ). A kŭŭ maaroŋ la a kŭŭ zaa tɔre naŋ be be kyɛ ka a moɔ/yoluŋ kŭŭ wuli ka a soba endaa ba kyebe (aŋa ba ŭŭ o la zie kaŋa kyɛ taa o zarema wane ka ba na koŋi) a kpare/pege moɔ de dɛlle.

Naaŋmene kŭŭ

Dagaaba bo ka neɛzaa naŋ kore ta taabo kaŋa bee a le/bɛ baaloŋ kaŋa te kɔɔre bee bibile ba naŋ dɔge ka o pɔre (bibile ba naŋ ba ta kyɛ ba dɔge ka o leɛ kpi) waa la Naaŋmene kŭŭ.

Pĩĩ-kŭŭ Ane yel-uraa kŭŭ

A sobie ayi ama neɛ naŋ maŋ tu a kpi maŋ koɛ taa guo, bonso a pĩĩ-kŭŭ maŋ baŋ waa la yel-uraa kŭŭ. A tɛɛtɛɛloŋ ba zãã taa a lɛ. Aneŋ ka Dagaaba kŭŭ zaa ba koorɔ weɛlɛ, kyɛ a pĩĩ-kŭŭ maŋ la maaleŋ pukyaare ne la seeloŋ poɔ yɛlɛ yaga gaŋ a yel-uraa kŭŭ. Te de ka kaapɔge neɛ e la dakyɛ ka kõɔ de o soba bee saa mie te zuo a wuo noba ne boma aneŋ meŋ neɛ kaŋa yãã peɛle la saa bonkyiiraa kaŋa anga kyaanaa, ka a saaŋ wa tanne na baŋ ko la o soba, azuiŋ te na baŋ yeli ka yel-uraa la. Kaapɔge meŋ o soba di la a Kolaa sane ka o nyɔge bee a toŋ tonfaare kaŋa ka ba ŋmɛ a saa eŋ o, te meŋ na tõɔ de eŋ a pĩĩ-kŭŭ poɔ aneŋ ka o meŋ uri ko la o soba kpeɛŋaa lɛ, kyɛ seeloŋ poɔ yɛlɛ la. Neɛ ba maŋ baŋ kyɛ te pɔge da bondiraa kanga bale daa poɔ, aŋa bɛŋɛ/seŋgbulo ba naŋ pɔge dii ne teenɛɛ ka a tuo ba yi baare kyɛ ka ba koɔre ko o ka o te di ka o nyaba ŋma ka o kpi, na be la o toɔraa a ne neɛ meŋ na baŋ kyɛ te da gyaŋgbonee/ɔnne tēē wa ko ne omeŋɛ. Azuiŋ, pĩĩ-kŭŭ na baŋ waa la yel-uraa kŭŭ, ka yel-uraa kŭŭ meŋ baŋ waa pĩĩ-kŭŭ. Pĩĩ-kŭŭ mine la; popaal, Teŋgankŭŭ, neɛ naŋ leŋ omeŋɛ daseelɛ, dapɛrɛɛ nennyɔgraa ane a taaba. Yel-uraa kŭŭ meŋ la; lɔɔre bee popo naŋ ŋmɛ neɛ, neɛ naŋ do teɛ zu a le, karaa naŋ uri kyɛ neɛ bee moɔ naŋ goɔ neɛ ane a taaba. Ka fõõ kaa Dagayiri, ka neɛ puori wa paale ba maŋ bo ka o soba sãã la a ŋmemɛ/tebɛ, ka a lɛ vɛŋ ka ba suuri iri ka ba wuo boma a seɛme o soba puoriŋ ka o paale. A lɛ neɛ na baŋ yeli ka pĩĩ-kŭŭ la, kyɛ a sobiri kaŋa meŋ popaal kaŋa meŋ na baŋ waa la popaal-peɛlaa.

Tɛɛtɛɛloŋ

Tɛɛtɛɛloŋ naŋ be Dagaaba bana zaa naŋ maŋ kono ba kuori laŋ ne o maaloo (luou sɛŋ Dagaaba) ane bana naŋ maŋ koŋ baare a kyɛ biŋi bebiri la leɛ maale (Saparɛɛ/Mantarɛɛ Dagaaba).

Luou sɛŋ Dagaa komaale

A yi o Kaleo ne o korbilii te nyɔge ne o Wa puoriŋ, Dagapaaloŋ noba bana zaa naŋ kyɛre maŋ tu la a tuuruu ŋa gbɛɛ ka kuuŋ ko. A komaale yeltuuraa ŋa maŋ la a kŭŭ yelmaale pare baaraa naŋ maŋ wuli ka a dɔɔ/pɔge kommu yɛlɛ baarɛɛ la; a kyɛre o uumu. A luou sɛŋ ka dɔɔ kpi ba ma nare o la a so o kõɔ, a seɛ o Daga-kurlanne a yi dɛlle. A ko/eŋ o tammo ne piime o nuŋ a pɔge de malfa poɔ o, ka o na gu ne omeŋɛ o soriŋ. A la iri bonvoba mine te seŋ; noɔ, boɔ, peroo bee baa gba a voɔ ne (a ko o nimitɔɔreng) a paalaa pare. Kyɛ dɔɔ zaa naane ka ba voɔrɔ ziiri mineŋ. Ziiri mine dɔɔ naŋ ta dɔɔ (a taa pɔge ne biiri) la ka ba maŋ voɔ. Ba maŋ la iri la kagyini (gyerebara/kazeɛ bee zeɛ), ane kubiri a pãã de dããtuo. A dããtuo la maŋ wuli ka o ne teŋɛ zu barɛɛ taa. A noɔ/nɔdaa ba naŋ maŋ de voɔ ne o wuli ka, a nɔdaa la na mang kong a seng. Ka a boɔ/peroo meŋ wuli ka dɔɔ zaa maŋ guolo la; ka a lɛ na vɛŋ ka a guoluu ta le. Ka a baa meŋ wuli ka dɔɔ ba kpeɛrɛ moɔ o yoŋ bee kaapɔge o soba meng daŋ di zēɛ (a ko neɛ o nyɔvoreŋ). A donne ama (naabo, boɔ, peroo, noɔ) koobo a kŭŭ ningeŋ meŋ na baŋ wuli ka kaapɔge a dɔɔ dɔgraŋ (areba, saaŋkoma) kaŋa daŋ ko o la bonguola ka o eŋ zagaŋ, azuiŋ a o aremine na baŋ kyɛ (ko) la a doŋa kaŋa (ko-naabo) a kuori zie.

Ka pɔge meŋ la wa kpi, ba maŋ nare o la so o kõɔ, zɛ o kãã polpolpol! A daŋ seɛ o gammie, a la seɛ o muŋanne/leɛne bee vasɔglaa, a poɔ muŋkuri, a la de seɛbiiri kparoo ane o wagyɛ pege ne o. A pãã de zutara ane tookpama a poɔ kɔkɔre lɛɛ ane nubama, ka toraalee wa peɛle ka ba de saŋ ne o bare ka o nyuuro o zaa fenɛfenɛ aŋa gyɔɔne pɔlbile naŋ yi Komaase wa paaloŋ na. Ka bana pãã wa baare a kyɔgroŋ ama zaa, ba maŋ de o la yi zegle a paalaa zu a eŋ o ŋmane ane kõɔ-suree o nuuriŋ ka o na te ɔnnɔ ne kõɔ kora saamba. Laare, laabili ane dogere (o bondimaale boma la) zaa meŋ maŋ poɔ la. Ba meŋ maŋ baŋ kyɛ la donne pɔge kŭŭ niŋe aŋa a dɔɔ deme na kyɛ tɛɛtɛɛloŋ fēē maŋ be be la.

Te zie be (Loraa ziiri yaga) te maŋ ligi la pɔge ka onaŋ kpi. Ka pɔge naŋ ta pɔge (kuli serɛ dɔge biiri) wa kpi, maŋ taa la bon-iri mine ka ba maŋ de eŋ/bare ne o sori. Ana la bo-nyaŋaa, saare, bondogle, ŋmama, vuuri, boredaa ane boreŋmanlee ane a taaba. A pɔge nga tɔ meŋ (pɔge naŋ kuli serɛ dɔge bibiiri) wa kpi, ba maŋ ligi o la kyɛ baŋ ŭŭ. O sãã yideme la maŋ toŋ a toma ama. A pɔge serebɛ maŋ iri la pɔge boma te seŋ ŋmama, laabili, dogere, yoe, saɛ, vue, ane sulli, a pãã de boore ayi poɔ ka ba kpɛ die te tu ne a tuuruu. Ma tara (neɛ ma naŋ neŋ voorɔ) ba kpeɛrɛ a be (libu dieŋ). Ka pɔge meŋ wa waa dɔɔ a yiriŋ ( neɛ naŋ bɔ boɔbo kyɛre pɔge ko a yiri dɔɔ kaŋa) ba maŋ baŋ kyɛ (ko) la doŋa ko o. Ka onaŋ meŋ wa poɔ gɔɔre mine poɔ te seŋ meɛbo bee wuobu, ba maŋ iri la o gɔɔroŋ doŋa ko a o taaba na naŋ zo a o kuori. Yɛlɛ mine meŋ na lɛ be be la, ka dɔɔŋ wa kpi ba maŋ eŋ la a pɔge naao kogansɔglaa, lɛ meŋ la ka a dɔɔ pɔgeŋ wa kpi, a dɔɔ maŋ eŋ la a naao kogansɔglaa. A kogansɔglaa ŋa la na wuli ka a kotuo soba (a pɔge serɛ bee a dɔɔ pɔge la kpi ) haali ka fõõ meŋ waa saana a kuori poɔ, kyɛ fo na baŋ la.

Ka a kuori wa koŋ yi baare, a maaloo la meŋ la kyogi a daadaa lɛ. Tampeɛ sɛŋ ka dɔɔ wa lɛ wa kpi ka ba koŋ ŭŭ baare, ba maŋ are la a lɛ o dapɛnne ata daare a kyɛ o kpēē daa. Dɔɔ zaa naane kpiire ka ba pɛnnɛ o kpēē. Neɛ na naŋ seŋ ne kpēē la dɔɔ naŋ taa pɔge ne bibiiri, bonso a bibiiri la maŋ pɛnne a o kpēē. A wa meŋ, neɛ naŋ taa gyeremɛ/to tonveɛle o nyɔvore poɔ. Ata soba, neɛ naŋ baŋ Dagaaloo/tuuro Dagaaloo a wa kpi. A baaraa, neɛ meŋ naŋ kore ta taabo kaŋa la ka ba pɛnnɛ o kpēē. Neɛ na naŋ ba seŋ ne kpēē daa la pɔge, a tɛgɛ la ka pɔge ba soro yiri. A wa meŋ dakoɔre. Ata soba, neɛ naŋ ba tuuro puori (Dagaaloo), ane neɛ naŋ pɔge toŋ tonfaare o nyɔvore poɔ ka noba baŋ ne o kyɛ ka o wa kpi, haali gba o soba pãã nɔŋ o taa pɔge ne bibiiri seŋ wola kyɛ ba koŋ baŋ pɛnne o kpēē. Kyɛ nyɔge o Baabili ane Gyerɛbaa lamboe mine ba maŋ pɛnne la pɔge kpēē daa, ka kyɛ ba ba maŋ de poɔ ne a dɔbɔ deme poɔ, ba maŋ pɛnne baarɛɛ la a lɛ ara a lɛ nyɔge nage kɔɔ a de lɔɔ bare.

A yi a kpēē daa pɛnnoo puoriŋ, ka o soba wa taa pɔge a kyɛ tuuro Dagaaloo meŋ, ba maŋ goɔ la a pɔge yagraa. Kyɛ ka o soba ba wa tuuro a Dagaalooŋ kyɛ waa Kirisabie, ba na yɛre o la dagaraa. A lɛ meŋ la ka ba maŋ e a dɔɔ ka a pɔge meŋ wa daŋ kpi. Te zie ba sɛŋ (Loraa-Tampeɛ ) ka a dɔɔŋ wa kpi ka noba pɔge bo ka dambele baŋ la saalompelaa yɛlɛ (bo ka a pɔge la ko a serɛ), ba maŋ kpɛ la peraa kyɛ zɛ o (a pɔge) a yagra a vɛŋ ka o yɔ ne lɛɛŋ te ta kyue mine, a mine gba yuon-gbuli, ka bana ba wa nyɛ ka baalonfaa/yelfaa kaŋa kpɛ a pɔge a wagre na poɔ zaa, sɛre ka ba pãã te pɛge a dɛgre bare o. Kyɛ ka dambele meŋ wa sereŋ baŋ saalompelaa yɛlɛ, a pɔge meŋ sereŋ koŋ yi a poɔ. Dɛgre iruu bebiri, ba maŋ so o la kõɔ a pɔŋ o zusaalaa, a mɔŋ saao doge zɛdamboli (saalommaara/bulo zeɛre naŋ ba eŋ nyɛnnoo bee sɛlmaane) a ko o ka o di. Ka bana pãã wa iri a dɛgre bare baare, o ne dɔɔ yuo na baŋ gaŋ la, kyɛ ka bana ba wa so a yagraa bare kyɛ ka dɔɔ zaa bɔ yɛlɛ gaŋ ne o, sekalmanyuo la ka o soba puri waare omeŋɛ, moɔraa na kpɛ la o soba ka o kpi.

Saparɛɛ/Mantarɛɛ Dagaa ko-maal

A leɛ gaa sapare sɛŋ ŋa (o Kaleo, Saŋkana te kpɛ ne o Wane) ba maŋ koŋ la a kŭŭ a ŭŭ baare a kyɛ la biŋi kuori maaloo bebiri, aŋa yuon-gbuli poɔŋ. Ba taa la kyue mine poɔ ba naŋ maala ba koe, a kyue zaa naane. Yuompaalaa/Zombɛnte kyuu, Gonseɛ kyuu, Toloŋ/Domba kyuu ane Boŋo kyuu (thus, January to April) poɔ la ka ba maala ba koe zaa. Ka kuunee pãã nɔŋ a kpi Borebo kyuu (May) poɔ gba, kyɛ a kyue ama kaŋa poɔ ka bana wa te maala a. A tendeme zaaŋ maŋ lantaa biŋi a bebiyeni na a maale koe na zaa naŋ ko a yuoni na poɔ. Bonso ka ba ba maala kuori kyuu la kyuu zaa poɔ, kyɛ see a kyue ama N naŋ welle biŋi a saazu kyɛ poɔ yoŋ la? Ba ananso danwēɛ la: ka ba na sãã la noba bombulo, bonso ka fõõ meŋ sereŋ kaa a kyue na zaa naŋ kyɛre bombulo/kavaɛ saŋa maŋ la; a ayi soba, a yelnimizeɛ la ka ba ta sãã ba Semmare (masquerades) kyiire. A ba ko-maal yaga zie, ba maŋ boɔle la a semmare ama ka a wa. Noba mine te seŋ; aremine, neɛ naŋ tuuro Dagaaloo (a kpɛ Semma), bee neɛ naŋ kore te ta taabo kaŋaŋ wa kpi ba maŋ boɔle a la (Semmare) ka a wa a ba kuori maaloo saŋa. Bana naŋ daŋ baŋ/nyɛ a (Semmare), mannewuli seŋ ŋa ka a kyiire la bombulo, bonso ka lɛ a bombuli na maŋ buli a waa a lɛ, ka lɛ meŋ la ka a Semmare niŋe meŋ maŋ waa. A lɛzuiŋ la so ka ba ba maala a kuori ana wagre na.

Yɛlɛ mine N meŋ na lɛ baŋ kyaare ne a noba bama la, ka banaŋ wa so ba kŭŭ kõɔ bare neɛ ba gannaa. Ba yeli ka ka fõõ ba baŋ a kyɛ gaŋ, ka fõõ meŋ daare wa kpi fo na la yi la, fo koŋ baŋ gaŋ a booriŋ. A wa meŋ, bana, ba ba dɛllɛ kŭŭ paalaa zu aŋa teneŋ luou sɛŋ naŋ maŋ e lɛ. Ba maŋ mɛ la zaga (kŭŭ die) a maŋ biŋi ba kŭŭ. A zaga maŋ taa la dendɔnɔɛ ayi, a tukpeɛbo zie ane a tuyiibu zie. Fo koŋ baŋ gaa tu a yiibu zie a kpɛ, kyiiruu la. Aŋa luou sɛŋ dɔɔ na maŋ wa kpi ka ba nyɔge o pɔge ne naao kogansɔglaa na, saparɛɛ eŋ ka dɔɔŋ wa kpi a kotuo soba (kŭŭ pɔge) maŋ sue/yarɛɛ bompeɛle bee a leŋ zutara/zutala peɛlaa.

Aŋa te luou sɛŋ dɔɔ na maŋ wa kpi ka ba voɔ o na, saparɛɛ meŋ taa la yeltuuri ata mine naŋ waa ba ko-maal yelnyaa, ka ana la; kukuri doŋa (peroo) gbaroo, (ba maŋ iri la peroo gbare kukuri eŋɛ; a wuli ka o koɔbo/kukuri doŋa la lɛ), kuuri vaabo (zie naŋ wa nyaa ba maŋ de la dabilii ane kɛkɛrɛɛ ŋmeɛrɛ kyɛ yiele ka noba [dēɛmine, baaloŋ deme ane a kowaaneba] gɛrɛ yɔɔrɔ. A bebiri ŋa la dooga diibu bebiri, daanɛɛ ne bondiri ba mang taa daŋmeɛraa ka noba mogiro kyɛ nyuuro vɔrɔ tɔntɔlɔ), ane gbori teɛbo (a yirdeme maŋ iri la doŋa ko a kpeemɛ aremine ka ba teɛ ne gbori). A baaraa ba maŋ lɔɔ la logi (zie naŋ wa maana ba maŋ de la a kpeemɛ logi a taa kyaare luou sɛŋ te lɔɔ bare kyɛ leɛ danna taa waana. Ba maŋ wa de la a o tammo yagle a yikpoŋ dendɔre poɔ kyɛ yaare), kaa Ali (2017) ganlee poɔ nyɛ. N ba maaleŋ baŋ baare kyɛ N woŋ ka a saparɛɛ meŋ maŋ ligi la ba pɔge ka ona wa wa kpi.

A saparɛɛ meŋ ka neɛ wa kpɛ Kirisaaloŋ poɔ a Dagaraa la ka ba meŋ maŋ yɛre a soba. Kyɛ ka o soba meŋ wa tuuro a Dagaaloo sobiriŋ, a kopɔge na yoɔrɔ la a kyɛ guuro ka ba wa te maale a kuori. Aŋa luou sɛŋ ba naŋ maŋ zɛ o yagraa tɛmpelaa na, saparɛɛ eŋ, a kopɔge ba ennɛ tookpama ana wagre na poɔ. A yelnimizeɛ kanga la, ka o ba ɔɔrɔ noɔ nɛne ana wagre na meŋ kyɛ guuro ka ba wa maale a kuori. A kuori maaloo daare ba meŋ maŋ so la a pɔge Kõɔ a pɔŋ o zusaalaa kyãekyãe, a doge a zɛdamboli meŋ ko o (kopɔge) aŋa a luou sɛŋ ba naŋ maŋ e a lɛ, a pãã de tēēsɔglɔ mine meŋ poɔ ka o di. Kyɛ ka ba meŋ nyaare zeɛ zɔŋ neɛre zu a bu ne kõɔ a ko a bibiiri ka ba meŋ nyu. A pãã yi a lɛ o na tõɔ kaa iri dɔɔ a yiri poɔ be a gaŋ ne o, kyɛ ka ona ba wa tõɔ di a tēēsɔglaa na, ka nimizeɛ la.

Dagaaba kuori kommu Ane O Maaloŋ Ananso

Aŋa, N daŋ yeli a saazu kyɛ na, Dagaaba waa la noba mine naŋ ba deɛnɛ ne kŭŭ. Azuiŋ neɛ ba kyɛnɛ ganna kuori bara, ka fõõ e a lɛ kyiiruu la. A kuori kommu ane o maaloo yelnimizeɛ zaa la, a kotuo deme maŋ kono boɔlɔ la a kpeemɛ, a wullo dɔgroŋ bee nerroŋ na naŋ be ba ne a kpeemɛ sogaŋ. A ayi soba, a wullo la nɔmmo. Ka ba wuli ba nɔmmo ka a kpeemɛ baŋ ka o taa la poteɛrebɛ. Ata soba, ka ka ba eng a kpeemɛ sori ka o kyɛŋ velaa a ta o noba zie (Dapare). Anaare soba, ba maŋ koŋ kyɛ maale la ka lɛ na vɛŋ ka a kpeemɛ ta wa de suuri tuuro ne a voba yelkaŋaŋ. Anuu soba, ka ka a kpeemɛ wa gaa bee ta dapare teŋ ka o ta yinni a ba voba yɛlɛ. Ayoɔbo soba, ka ba wuli ka a kpeemɛ da sereŋ poɔ la noba poɔ teŋɛ zu kyɛ ka ba wɛle taa.

Nembɛrɛ maŋ yeli ka yelyaga ba daara wiri, kyɛ be N naŋ de a kɔnoɔre ŋa wa ta ne, N na de biŋi la a kyɛ. N bareka puoruu na gaa ko la a saazu ŋmene, bana zaa N naŋ boɔle a de teɛroŋ yi ba sɛŋ ane bana zaa naŋ sãã ba wagre a kanne a yelyagsɛgraa ŋa.

Yɛ zaa yɛ bareka yaga zaa.