Yeli:E-ka-noɔ-kpɛ-kpaare (motivation)

Nuobepuori(2022) yeli ka karembie zaa e la bommbɔgelaa a karema naŋ seŋ ka o maŋ mɔgelɔ ka o eŋa noma ka o toɔnɔ zanna ka lɛ naane fo na wa banna ka a karembie doɔɛ la. A lɛ na, karema zaa seŋ ka o maŋ taa nɔnoɔ kyaare ne o karembiiri wulibu. karema zaa feroo tonnoɔre la ka o maŋ vɛŋ ka e-ka-noɔ-kpɛ-kpaare yeltarre be wuluu dɔlɔ yeltarre poɔ. E-ka-noɔ-kpɛ-kpaare e la yel-erre na zaa a karema ne a karembiiri naŋ maŋ erɛa karendieŋ ka lɛ vɛŋ ka a karembiiri enne noma kyɛ nyagera ka ba paaŋ la maaleŋ uro vuuŋ, a boɔrɔ a zannoo poɔ poɔbo. A lɛ na, e-ka-noɔ-kpɛ-kpaare ba taa eebo wagere karembiiri wuluu saŋa.A piili a zannoo piiluu te ta a baaraa vuo zaa poɔ la ka fere ka a karemamaŋ vɛŋ ka e-ka-noɔ-kpɛ-kpaare yel-tarre maŋ bebe. E-ka-noɔ-kpɛ-kpaare deɛ ba e karema naŋ na de kyɔɔtaa bee bonsirikyi kaŋa ko karembie yoŋ, kyɛ yel-eraa na zaa o naŋ na e ka a karembie eŋa noma ne a zannoo e la E-ka-noɔ-kpɛ-kpaare. A karema na baŋ boɔle la a karembie ganda yuori kaŋa bee ka o vɛŋ ka a o karembitaaba ŋmɛ nuuri ko a karembie kaŋa mɔ yelkaŋa eebo eŋɛ. A karema gba na baŋ danne la a karembiiri te seŋ: i. Garebanyɛ! ii. Fo ba nyɛ bie! iii. Gandasoli iv. Fooŋ yoŋ v. Taa a lɛ ane a taaba mine.

E-ka-noɔ-kpɛ-kpaare po eŋ la ziri ayi: i. Meŋɛ e-ka-noɔ-kpɛ-kpaare ii. Yeŋe bee neɛ e-ka-noɔ-kpɛ-kpaare.

Meŋɛ e-ka-noɔ-kpɛ-kpaare: O maŋ yi la karembie meŋɛ zie ka lɛ vɛŋ ka ba enne maŋ nyagera ka ba paale a zannoo poɔ. o ba maŋ yi neɛ kaŋa zie.

Yeŋe bee neɛ e-ka-noɔ-kpɛ-kpaare: A e-ka-noɔ-kpɛ-kpaare ŋa maŋ yi la a karema zie bee yel-erre mine ane a wuluu bonteɛre zie. A wuluu dɔlɔ na a karema naŋ maŋ de wullo ne a karembiiri gba na baŋ e e-ka-noɔ-kpɛ-kpaare ka lɛ vɛŋ ka a karembiiri taa popeɛloŋ ane ennoɔ a zannoo poɔ.