Dabaŋkoroŋ

Dabaŋkoroŋ: tembile kaŋa ba naŋ boɔlɔ Kyɛbɔgɔ Gɔbena Sakuuri kaŋa poɔ da la ka Toor-laara ne o ba Banfotoɔre, Nɛɛ-ɛro ne o ba Garapɔgere, Fabaarekyi meŋ ne o ba Kūūlaŋ zeŋɛɛ a Karemazuzeɛ ɔfese poɔ baguo gbelime ayopoi koseɛraa nyaazie.

Ba zemmo zaa wulee ka ba boɔrɔ la a karemazuzeɛ. Dɔɔ eŋ-ŋmeene kaŋa da wa kpɛ gaa sɛge la o yuori kyɛ yeli ka a karemazuzeɛ waana la. O noɔre teŋɛ leebo la ka a Karemazuzeɛ, Danyaakoroŋ la kpɛ. O puoree kyɛ gaa zeŋ o kogo zu.

Danyaakoroŋ yuori zuiŋ, teɛroŋ zuluŋ kaŋa tɔ o la ka o deɛ baŋ ka a noba bama zemmo wuli ka ba biiri yoe emmo la ka ba wa.Danyaakoroŋ ne o saseɛ peɛle baaroŋ la ka Banfotoɔre da vare kyogi  yeli ka ba waɛ ba biiri yoe emmo.

Dagaaba naŋ maŋ taa ba ananso ba yoe porebo poɔ, Danyaakoroŋ yuori deɛ tue o yel-e.  O yeli ka Banfotoɔre ta ferɛ omeŋɛ bonso o tandagere na o naŋ tuo ba e bon-dɛkɛlɛ. Ba zaa nɔɛ kpɛɛ kpore ka Banfotoɔre zeŋ fãã kyɛ soore Danyaakoroŋ lɛ o naŋ e kyɛ baŋ ba zemmo pare ka kaŋazaa ba yeli ko o.

Hmmm......., Dagaaba  ane ba yoe porebo. Nembɛrɛ maŋ yeli ka yeliyaga ba daara wuri, N koŋ vɛŋ ka te tage n yuori pare gaa tɔɔre kyɛ bare bone na te naŋ zeŋ kyɛ. O vɛŋɛɛ ka kaŋazaa pore o ne o bie yuori ka o sɛge. Banfotoɔre ne o noɔre ba pagebo zuiŋ, O vaa iri ne o bidɔɔ Toor-laara a pore. Ba zaa boɔle la ba yoe tere ka o miine o eŋɛ a sɛgerɛ a yoe kyɛ Kūūlaŋ ane o wolonwoloŋ zuiŋ da zennɛ faana, a nyɛ wagere naŋ gɛrɛ, bonso o na boɔrɔ ka o gaa die wiēū a gaa weɛ.

Danyaakoroŋ ne o dɔɔloŋ waabo zuiŋ baŋ ka koɔbo saŋa la ka a seŋ ka dɔɔ ne dɔɔ zaa gaa weɛ, Ka o da sɛge a yoe ŋmaara ŋmaara lɛ. Lɛ la ka Garapɔgere soore Danyaakoroŋ wagere na naŋ seŋ ka ba wa a Sakuuri bonso o bidɔɔ Nee-ɛro maŋ gbiri la aŋa dopoɔ.

Da gɛrɛ be koroŋ ka gbɛre bɔ yaane, Kūūlaŋ zɛgere la o nuu kyɛ yeli ka o deɛ faaɛ o noɔre yɛlɛ. Karemazuzeɛ zaa ne o yelyaga da vɛŋ la ka Danyaakoroŋ da ba teɛre ka o manne a sakuuri yɛlɛ ko ba. A ne o yɛlɛ baaroŋ la ka a bidɔgereba zaa vaa iri ne ba biiri kyɛ puori o bareka ane o wagere o naŋ taa ko ba kyɛ vare yi Danyaakoroŋ Ɔfere poɔ te gɛrɛ yiri.

Kaŋazaa naŋ da ta o dabuo poɔ la ka Garapɔgere boɔle o bidɔɔ  a yeli ko o ka o woŋee lɛ o Karemazuzeɛ naŋ vare vare a sakuuri yeltare te seŋ o gaabo wagere? Nembɛrɛ yeli ka dabēɛ sobaŋ taa yiri kyɛ maaŋ eŋ, muri ba muulo n pare, ta wa gbire aŋa a dopoɔ.

Nɛɛ-ɛro  saa noɔre ba le teŋɛ kyɛ ka o yeli ka o woŋ a la. Zenɛ eŋ N na gbiree wiēū a tõɔ iri gaa ka wagere ta pare.

Neŋkpoŋ zaa ne o kɔkɔre, Garapɔgere yeli ka boreŋmaao guro pĩĩ; ka o na ba woŋ, a o toori la mɔg o.

Dɔɔ kyɛ maŋ gbiri aŋa bieo ba kyebe ka neɛ boɔra ka o zale o gaa neŋ. N ba maŋ yɔllɛɛ yɛlɛ ka a waa mɛlɛmɛlɛ aŋa pɔgesara parebie. Ŋaa ka ba leɛ leɛ taa yɛlɛ wa kyɛlɛ gbelimpie pare te gɛrɛ. Zie da vɛllɛɛ la ka ba gaa sakuuri. Aasonibe naŋ waa ba karema boɔle la ba yoe kyɛ vɛŋ ka ba wuli bamenne ko ba karembitaaba.

Wulibu ane zannoo gɛrɛ la gidigidi. Daare ata poɔ la ka Fabaarekyi gaa a sakuuri te zaara gakogilo moɔ poɔ. Ka neɛ ne neɛzaa haa noɔre o maŋ pɛge o la aŋa ŋmane. Toor-laara aneŋ o beɛre Nee-ɛro nimie naŋ koŋ baŋ kpinni gampeɛle zu eŋ da vɛŋ la ka Aasonibe iri ba gaane karenderi ayoɔbo poɔ.  

Nembɛrɛ yeli ka na e neɛ la maŋ e o meŋɛ; Fabaarekyi nimie zaa pɛlle a Toor-laara neŋ o beɛre Nɛɛ-ɛro naŋ da be karendi yuo poɔ ka o noɔre nyɛ gyɛlɛ.

Ŋaa da vɛŋɛɛ la ka Fabaarekyi neɛ Aasonibe ka zie wiri naŋ gɛrɛ be ka boŋo meŋ gɛrɛ. O noɔre pɔgebo poɔ la ka Aasonibe yeli ka bie naŋ yeli ka o ma koŋ gbiri, ka o meŋ koŋ gbiri ka a karendie zaa da hunihuno aŋa sibie.

Fabaarekyi zu naŋ pãã waa aŋa soɔ a zannoo poɔ, o paresɛge koŋ mare teŋɛ da vɛŋɛɛ ka o de suni sɔsɔ o zenzie kyɛ zanne gama aŋa gakogelo ɔɔbo.

Yuoni naŋ wa baare ka ba sɛge ba gyennoo, Fabaarekyi yuori la da seɛrɛ bawaa saazu. Nembɛrɛ maŋ yeli ka tage-kaŋ-tage arɛɛ ŋmane da vɛŋɛɛ ka nembure daa kpɛ  Aŋsonibe ka o toŋ o woɔ poɔ voɔ libie zaara ennɛ Fabaarekyi bonso o vɛŋɛɛ la ka o baŋ ka o na baŋ zanne la kyɛ ka gakogilo meŋ na waa hɛmɛmɛ o zie.

Fabaarekyi karendie anaare poɔ la ka Toor-laara ne o beɛre gaa be la karenderi ayopoi. Fabaarekyi de la sakuuri gaabo eŋ o gɔɔre nuure kyɛ peɛle saseɛ eŋ o dɔgereba tobo ka o karema ko o la koseɛ-gbuli ka o pɛnne bonso ka ona karema koŋ baŋ de o kannoo manne ona.

Nembɛrɛ maŋ yeli ka boŋ ka toori boɔrɔ ka yelnoore naane kyɛ hɛmɛmɛ kaŋa kpɛɛ Kūūlaŋ ka o zeŋ fãã kyɛ gboli boɔle Fabaarekyi yɔɔle Tanyɛ ka o digi nyɔge o kpaããõ kaŋa kɔŋe o vore ka o ma maale ne zeɛre ko o bidɔɔ Fabaarekyi.

Zie naŋ beɛrɛ a soɔrɔ la ka koseɛre gbuli la da pare aŋa saseɛ, ka Fabaarekyi gaa sakuuri. O noɔre maaɛ o naŋ nyɛ a sakubiiri zaa naŋ yɛre bonsu paala a nyuuro ligiligi aŋa kyakyore naŋ yi bogi. O maŋ zeŋ fãã la kyɛ leɛ kaa wɛloo wɛloo lɛ.

Derpɔge kpɛ la a karendie poɔ soore Fabaarekyi o sakuuri ba waabo ananso ka o peɛle saseɛ ka o ma kooraa la iri ka o taa o gaane asibiti ka a dɔɔta da gaale o.

Lɛ la ka Dɛrpɔge  yeli ko o ka o na ko o la tɛɛse ka o sɛge ka o na paasi ka o naŋ ko o la a bonsupaala kyɛ ka o na fieli ka o na ŋmaa la daa eŋ o.

Fabaarekyi yɛŋ naŋ waa Ŋmene koobo, o eŋɛ da ba nyiili ka o sɛge tɛɛse. Dɛrpɔge noɔre da soe kõɔ lɛ Fabaarekyi na ba nɔge sakuuri gaabo kyɛ deɛ gbaale wuo a soorebie nɔɛ zaa a ba nɔŋe ka o ko o gyeremɛ neŋ a soorebie o naŋ woŋe tuo a mare paresɛge teŋɛ kyɛ soore o.

A yuoni baarɛɛ la ka karemamine leɛrɛ ba biiri karenderi ka Toor-laara ne o beɛre Nɛɛ-ɛro yoe la te peɛle weɛŋ karenderi anii soba poɔ kyɛ ka Fabaarekyi meŋ lɔnnɔ o karenderi anuu soba meŋ.

Pɔgeba yɛlɛ ne nɔdaa koŋ uori, Anaŋ-e gaaɛ kõɔ ɔmbo ka ona ane Konnyãã te zɔɔrɔ taa ba biiri sakuuri gaabo yɛlɛ. Ŋa zaa boɔra ka o wuli o tasoba o bie zannoo naŋ duoro saa a sakuuri poɔ.

Nembɛrɛ naŋ maŋ yeli ka kannyiri soba peɛrɛ naasara bere kyɛ Konnyãã ne o yuori, nyɔgɛɛ Kannyiri ne gɔɔ kyɛ yeli ka ''Ba naŋ ennɛ biiri sakuuri la ka neɛ kaŋa meŋ o bidɔɔ gaa eŋ ka o maŋ gaa ɔɔrɔ gakogelo''. A yeluu ŋa tɔ la vūū eŋ Anaŋ-e ka o   are beremm lɛ.

A yi yeŋe te woŋ die yɛlɛ la ka Anaŋ-e ŋmeɛrɛ fansane o zu poɔ a yi o bidɔɔ sakuuri gaaboŋ. Vūū  na koŋ baŋ kpinni lɛ, ka Anaŋ-e ɔŋe o kõɔ zo gaa die wiēū ka ona ne o bidɔɔ la te binne gbɛɛ.

Kɔlaa naŋ ba peɛle la ka gyaŋgbonni zaa e dēɛdeɛnemɛ, Kyɛ Kūūlaŋ naŋ ba peɛle a yiri zaa ŋmeɛlɛ nyoore.

Anaŋ-e meŋ naŋ ba waa nentoraa kyɛ duoro o kɔkɔre vɛŋɛɛ o kooraa iri o. Dabēɛ zaa kpɛ la Fabaarekyi ka o lonno o zaa ka o eŋɛ zaa suoro wale aŋa ba-gbɛre.

Nembɛrɛ naŋ maŋ yeli ka ba maŋ fuoree baa bēē pɔge a toloŋ da vɛŋɛɛ la ka Fabaarekyi zeɛ Anaŋ-e pare o bɔgɔŋ a yi laare pɔge a sori zaa beenɛ lɔɔrɔ kpɛlle lage lage gɛrɛ asibiti poɔ.

Ŋmene ne o bammo zuiŋ, kpɛlle bota lɔɔbo poɔ la Kūūlaŋ da lugi o ŋmane a sigi o kuriwiri zu sori poɔ a na nyɔge o gandaa ka o ti. Nembɛrɛ naŋ maŋ yeli ka toloŋ la maŋ kpɛ zanzaŋaa ka o la, wɔgeloŋ kaŋa sereŋ vɛŋɛɛ Kūūlaŋ bugebu baare a wagere na zaa poɔ.

Ba asibiti kpeɛbo poɔ la ka Nɛɛ-ɛro la ka ba meŋ zalle kpɛ ne a asibiti poɔ a yi o naŋ da gaa sakuuri baguo na, O zeŋɛɛ a karendie zanna kyɛ ka o eŋɛ ba la lantaa.

Ba de la ba zaa gaale a asibiti poɔ kyɛ ka asibiti zaa e miloo ne saku-biiri ka kpɛlle maŋ do saa lage lage a yi Nɛɛ-ɛro naŋ kombaŋ yeli yɛlɛ zaa kyɛ gaŋe aŋa neɛ naŋ va vaare.

Daa ane beri ayi poɔ la ka Anaŋ-e nyɛ sambo ka dɔɔta bare o ka o gaa die kyɛ Nɛɛ-ɛrɔ da ba sɛ binni lɔɔ a dɔɔta. Garapɔgere meŋ naŋ zoro tembeene kyɛ a wagere na poɔ o waaɛ neɛ naŋ be nemburi daa.

Noɔ naŋ maŋ yeli ka bonzaaŋ puro wale ka kyɛ kɔɔloŋ la maŋ pɔge, Kyɛ Konnyãã meŋ naŋ waa pɔge-leɛ-dɔɔ, bare la a baala ko Toor-laara a asibiti poɔ kyɛ gbaale o berɛ zaa ne. O nuuri a lantaa kyɛ yeli ka soɔŋaa ko o gbɛre, O  te gaa bɔge bɔgera kaŋa zie. O peɛroo baaroo poɔ la ka Nɛɛ-ɛrɔ lɔɔ kpɛlle bambamaŋ ka a asibiti zaa deɛ waa wolomboll kyɛ kɔɔ gɛrɛ Garapɔgere yiri.

Neɛzaa noɔre kpɛɛ kpore, ka dɔɔtare zaa maŋ nyɔge bamenne fãã kyɛ wuoro nuuri ane gbɛɛ tuoro ba zureŋ. A kūū yiri taabo la ka sakubiiri paalɛɛ zie zaa a uoro. Ka fooŋ waa neɛ naŋ na baŋ pɛ nasaara berɛ kyɛ a zie na naane.

A karemazuzie iree saku-biiri bata mine a saakonnoŋ tuubu eŋɛ. O eŋ la a saku-biiri zaa ane a karemamine are villikɔlle a kūū naŋ dɛle a paala zu kyɛ ka o piili ba yoe porɔ.

Dakoraa................N be kyɛ

Ayɔɔ.....................N be kyɛ

Dɔɔpoɔ................N be kyɛ

O naŋ haara o noɔre na pore Nɛɛ-ɛro yuori ka a saku-biiri zaa faara kyɛlle ka a zie zaa deɛ tɔ de ane kuori, ka nyɔɛ feerɛ, ka ma-biiri boɔlɔ.

Nembɛrɛ naŋ maŋ yeli ka bibilee kuori ba beɛrɛ bieu kyɛ ka Nɛɛ-ɛro meŋ naŋ waa yuomo pie ne anuu vɛŋɛɛ ka ba va a kuori ŋmaara ŋmaara lɛ.

Nɛɛ-ɛro naŋ kpɛ bogi dare ayi poɔ la ka Toor-laara ŋmɛ o kyankyamponne a na yi gaa sakuuri. O yeŋe yiibu ane o saa Banfotoɔre daŋgbale zaabo zaa e la boŋyeni. A da kyɛre fēē lɛ ka a daŋgbale koɔle o tobo ayi zaa lantaa kyɛ ka Banfotoɔre tanne ka o gaa fori o peɛmɛ na kyɛ de kuuri ka ba gaa weɛ.

Ba gaa la a weɛ ka Toor-laara maŋ koɔrɔ kyɛ ka o niŋe zaa ko saa bimbiŋ lɛ a buulo kõɔ kyɛ ka Banfotoɔre  yeli ka sakuuri gaabo ba la kyebe. Banfotoɔre meŋ naŋ waa bondaana a yi guolo poɔ taa la donne tɛɛtɛɛ te seŋ nii, peere, ane boore a paale zage ko Toor-laara ka o na guolo. Ba zaa bayi maŋ be la a weɛ poɔ ka gbelli pie ane ayi te ŋmɛ pare kyɛ ka Banfotoɔre. maŋ naŋ e ka o gaa lori a boore ane a peere kyɛ yuo a nii gaane moɔ.

Neɛ naŋ yi ne posaana a naabaa, wola ka o na nyɔge kannyiri kyɛ gu a nii?  Ŋaa ka Toor-laara yɔ ne a nii lɛɛŋ a wa yeli ka o zeŋ teŋɛ pɛnne ka goɔŋ va de o.  A ne o zubie na zaa kyɛ Ŋmene sereŋ are la o puori. Ka anaŋ da ba waa Ŋmene bammo zuiŋ ka a nii zaa gaa va de Banfotoɔre kamaa-pɔlɔ naŋ soɔ gbiri gbirI kyɛ de vaara lanna taa te gɛrɛ a weɛ baaroŋ.

Banfotoɔre meŋ naŋ be wɛ-kpaareŋ koɔrɔ, meŋ baŋ ka vūū dire la o nimitɔɔre be. A naabo kaŋa naŋ koŋi la ka o gbaale iri ne o lare a kpa o tobo zaa a na woŋ a uoruu naŋ lugiro yire.

O da ba woŋi yelzaa kyɛ leɛ ka o la nyɔge a lare teŋɛ ka a naabo la uori a boyi soba. A naabo uori baaroo zaa ka o vare iri ne o lare kyɛ yeli ka ''Zo-ŋmaa'', o naabo kaŋa naŋ deɛ waa aŋa o maŋ wono la boŋkoɔre nyuu. Ka fõõ pãã gu o wola zaa kyɛ o zage kpeɛbo zaa seŋ ka o kolle weɛ boŋkoɔre kyɛ baŋ kpɛ.

Banfotoɔre naŋ sereŋ baŋ o waaloŋ vɛŋɛɛ ka o are fãã kyɛ de o soɔ ane o lare, a na beɛre a uoruu yi waabo zie. Ŋaa ka o su o zu mare teŋɛ veɛrɛ a kamaana a wa zɛgerɛ o zu na kaa nimitɔɔre ka o nii la yɛre page a weɛ zaa saana a boma zaa te gɛrɛ.

Banfotoɔre naŋ sereŋ waa dɔɔ a maŋ nyɔge kannyiri ane dɔɔloŋ, kyɛ a yɛlɛ ama bugi la o zu ka o kyaporo zaa uro vūū ka o deɛ lɔɔ kpɛlle gɔɔ ane doloŋ zaa bambambaŋ. Toor-laara naŋ bare teŋɛ zu wagere na poɔ ka ona ne dapare ŋmemɛ dire daa pãã baŋ ka kõɔ wuoro la o gbɛɛ be?

Banfotoɔre kpɛlle bonaare soba la ka o vaa iri a deɛ zoro a zie zaa boɔrɔ a nii. Ane a lɛ zaa Banfotoɔre naŋ bara la o kpɛlle bamabambaŋ a digire a nii kyɛ Zo-ŋmaa ba bare o uoruu meŋ.

Ŋaa ka Toor-laara meŋ da kpa o tobo eŋ a uoruu kyɛ beɛrɛ zie na o naŋ be. O moɔ yiibu la ka o weɛ kamaana na ona ane o saa naŋ dɔ a baguo la ka a nii yaare pɔge ɔɔra ka Banfotoɔre digire.

A e la kparaama kaŋa ko Toor-laara ka o gaa soŋe o saa ka ba kare a nii bare bonso Banfotoɔre na waa neɛ a maŋ ŋmaara daa enne o wagere zaa.

Ka pĩĩ na pãã kpɛ o seɛ ta ka o deɛ da tage vooroŋ dayeni eŋ o sukyiriŋ kyɛ vare yi a moɔ gaa ka ba te kare a nii bare, kyɛ  ka o la kare a kpɛ neŋ moɔ.

Toor-laara eŋɛ da miine la o saa naŋ na ŋmaa daa eŋ o. O noɔre zaa maa Banfotoɔre neŋ ba tɔŋe o kyɛ ka o kare a nii leɛ gaa ne a moɔ. Toor-laara sukyiri ba le o na be a nii zie ka o zu zaa nyiile o saa naŋ ba tɔŋe o a nii kare baroo poɔ wuli ka yelyaga be la a o zu poɔ. Zie soɔ la ka o kare a nii gaa ne die. Ŋaa zaa ka Banfodeme zeŋɛɛ o kogi zu ka niŋe ko saa bimbiŋ.

Toor-laara pɔge la a nii kyɛ gaa puori o saa naŋ dɛle kogo kyɛ leɛ kpɛ die poɔ. A ne a lɛ zaa o eŋɛ ba nɔmɔ kyɛ Toor-laara naŋ e bibili meŋɛ zuiŋ vɛŋɛɛ la ka Banfotoɔre voore fãã fēē kyɛ vɔle a suuri na zaa o naŋ taa, kyɛ boɔle o yeli ka ka zie wa vɛle soŋ ka o de yi tu a sakuuri sori gɛrɛ ka o ba la boɔrɔ o weɛŋ bee donne guubu.

O noɔre ba le teŋɛ sɛre kyɛ ka Toor-laara deɛ kyoŋi a puori o bareka.  Boŋ ka zɔŋaa boɔra ka nimie naane, ka o gaa ka kobo mare teŋɛ ka laɛ-laɛ. Ane ana zaa, Fabaarekyi naŋ gaa sakuuri baguo na ba nyɛ Toor-laara zo gaa la yiri te peɛle saseɛ eŋ o dɔgereba toboŋ ka Toor-laara barɛɛ a sakuuri gaabo.

Ŋaa la ka Kūūlaŋ zeŋ tol aŋa zɔŋaa naŋ ɔɔ sɛlmaanee, a wa yeli ka poɔ ba boɔra a la ka bie ba kyɛnɛ kyɛ ka ona ba taa yelzaa na yeli. Ka neɛzaa erɛ bone naŋ na pɛlɛ o poɔ.

Lɛ la ka Anaŋ-e meŋ zeŋ wa yeli ka ba naŋ ba ferɛ seebo ka o kpeɛrɛ yuori naane, kyɛ ka ona eŋ na yeli ka bore ŋmaao guro pĩĩ; ka ona ba woŋ a o toori la mɔŋ o.

Daa parɛɛ la kyɛ ka Fabaarekyi kpaare ba nyiile ka o leɛ gaa sakuuri kyɛ maŋ iri waa neɛ ka teŋɛ deme naŋ iri ka o guro a teŋɛ.

Fabaarekyi gyogo ŋa ba kpeɛrɛ Kūūlaŋ saabo diibu zie a yi zoma ane duori faare ba naŋ maŋ waana o yiri bebiri zaa wa manna kora o ka a da tɔ ferebo kaŋa eŋ o ka nɔdaa ne o koŋkoliirikoo zaa o be la o weɛ, a leɛ waana die ka zie soɔɛ bonso o suuri naŋ ba dire yɔgevaare zeɛre zuiŋ.

Dare ayi parɛɛ la kyɛ ka sakuuri leɛ gaabo yɛlɛ ba kye Fabaarekyi zuŋ. Pampana biiri na waa aŋa kɔmpuuta bommaale, Ba deɛ maŋ erɛɛ ba yɛlɛ ka dɔgereba ba kye ba yeluu la waa a yɛlɛ.

O eebo vɛŋɛɛ la ka Anaŋ-e maŋ nyɛ Konnyãã a wagere na kyɛ ŋmeenɛ o eŋ lɛ o naŋ na erɛ a ta wa ŋmaa zɔɔre eŋ o a yi ba naŋ manna taa ba biiri zannoo a sakuuri poɔ daare na ba naŋ gaa kõɔ ɔmbo. Ŋaa zaa ka Toor-laara be la o baaroo yuoni a sakuuri poɔ.

Baguo kaŋa la ka Kūūlaŋ ane Anaŋ-e sɛgere bamenne na gaa weɛ ka Fabaarekyi la vare yi o die a yeli ka, ona ne o pɔltaaba gɛrɛ la Kɔmpare salma toma. O noɔre ba le teŋɛ kyɛ ka Anaŋ-e deɛ wuo o nuuri tuo zuŋ kyɛ lɔɔ kpɛlle lɛ bambambaŋ kyɛ ka Kūūlaŋ are beremm a kpa o nimie eŋ o a wa yeli ka nembɛrɛ maŋ yeli ka neɛ naŋ nyɛ taŋa zu vūū, ka onaŋ moɔna a kyɛ ka bone naŋ be fo teɛroŋ ka fo gɛrɛ a salma toma..............

Ŋaa ka o yeli kyɛ de o lare ane o soɔ vare yi te gɛrɛ kyɛ ka Anaŋ-e deɛ maŋ yeli ka kannyiri ka zirii. A ne o kpɛlle na zaa kyɛ Fabaarekyi da ba sɛ bini lɔɔ o kyɛ kpɛ de o woɔ a meŋ vare yi te gɛrɛ.

Ka Anaŋ-e are la lɛɛŋ wa yeli ka sazu ŋmene, ka ona la iri neɛ la neɛzaa, kyɛ baŋ sori na zaa o soba naŋ na tu kyɛ nyɛ o maaloo, ka o kaara o bidɔɔ ka o neɛ va-maara,  a gaabo ane a leɛ waaboŋ.

Ŋaa ka o yeli kyɛ vare yi te gɛrɛ a weɛ. Ŋaa zaa ka Toor-laara sɛge la o sakuuri baaroo gyɛnnoo a gaa be teŋkpoŋ kaŋa poɔ kyɛllɛ o toma nyaabo. Fabaarekyi naŋ waa dɔɔbil-yeni kyɛ gaŋe dɔba pie vɛŋɛɛ la ka Kūūlaŋ ŋmɛ peɛloo beɛla bonso o naŋ da be yiri o maŋ ŋmaara la zɔɔre eŋenɛ a dɔgereba.

Kyuu ane daare ayi poɔ ka Fabaarekyi age le lɔɔre tombol kaŋa poɔ zimaane kaŋa a gaa iri popo paala kyɛ piili yiri meɛbo. A yɛlɛ ama da eɛ nɔmaa ko a teŋɛ deme zaa. Neɛ ba naŋ da maŋ tuoro o yɛlɛ gɛrɛ kora o dɔgereba ka a maŋ waa tuo ba laŋkpeɛbo poɔ, ba zaa leɛ tagera la bamenne mara o, a na lɛnne boŋkaŋa.

Dare ayi poɔ la ka o leɛ gaa ana te bɔ libie wa baare a yiri meɛbo. Nembɛrɛ naŋ maŋ yeli ka bone naŋ noma damboli noɔreŋ la baara o libie sereŋ da la. Salma toma naŋ waa zunoɔ boma vɛŋɛɛ la ka wɔgeloŋ kaŋa da kpɛ o a vuo na poɔ. Sori na o naŋ na tu a nyɛ warebie tõɔ ŋmaa peɛloŋ eŋ o nyagereŋ deɛ sereŋ e la salma na o naŋ boɔra.

A peɛloŋ nyaabo da vɛŋɛɛ la ka wɔgeloŋ kaŋa kpɛ o zɔmeŋɛ kaŋa ka o voore fãã kyɛ va de ba neŋkpoŋ libie mine iri ŋmaa ne vuo kyɛ ka a da e ferebo ko o ka o yɔɔ a sane. Ŋmaaŋa naŋ maŋ yeli ka, a maŋ wa moɔŋ ka a teere zaa zo laare deɛ da la; o maŋ kaa la doloŋ ane gɔɔ ka sonna kyebe. A na ba ɔɔ ɔnne kyɛ na nyɛ ɔnne bini.

Ŋmene ne o yelteɛbo ka a da e zunoɔ ka toma puri laare pɔge a teŋɛ zaa aŋa kyuu pelaa veɛloŋ. Boŋ ka zɔŋa boɔra ka nimie naane, ka o deɛ yeli eŋ o zu poɔ ka, ''Bone naŋ tõɔ o tɔ o naŋ vɔlɔ o''.

Beri ata poɔŋ, ka o leɛ a sane na biŋi teŋɛ kyɛ naŋ bɔ o boɔbo. Nembɛrɛ naŋ maŋ yeli ka ka fooŋ deɛnɛ ne balee ka o maŋ boɔrɔ la fo noɔre lɛnnoo sereŋ vɛŋɛɛ la ka o naŋ ko omeŋɛ ne a toma.

A maŋ toŋ toma ka nasaalba lɔɔkoɔraa meŋ alabareka na e wola ka eele ba ba teŋɛ?

Daa ane beri ata poɔ la ka o furi o die poɔ ka o koŋ baŋ ŋmaa peɛloo fēē eŋ o poɔ a na wa yele kõɔ nyuubu.

Zimaane kaŋa la ka Kūūlaŋ ne o Kaanyukõɔ yi ba weɛ ka  kɔŋ eɛ ka o leɛ ba bini teŋɛ ka Kūūlaŋ gaa ɔŋe seŋkãã sɛ na maa ne o nyaga, kyɛ ka Anaŋ-e naŋ woliwolo koridieŋ a na maale kpogilo ka ba ɔɔ la vare yi a gaa vaa a seŋkãã zaa te gɛrɛ ne.

Kūūlaŋ naŋ maŋ dire kannyiri wagere zaa kyɛ ama eŋ gaŋe la o faŋa, ka o deɛ tanne  Anaŋ-e ane suuri ka, ''N baŋe ka fele daŋ ba ŋmaa ka a pɛpɛle ba sãã'' kyɛ N baŋe ka fo naŋ waa ŋa duo, fo inne la N na daare e amine ka fo pɛge ma aŋa ŋmantuo.

Ŋaa ka ba leɛre taa yɛlɛ ane sue ka lɔɔre tombol wa are ka ba bidɔɔ la ka ba zɛle pare yi neŋ a lɔɔre poɔ wa lɔɔ ba nimitɔɔre a davoroŋ.

Wagere na poɔ bone naŋ na da ɔɔrɔ ba nyaga nyɛɛ sɔgeloŋ zie ka yiri zaa deɛ e gɔmɔ kyɛ ka Fabaarekyi deɛ leɛrɛ vɔgela aŋa neɛ naŋ na va vaare zenɛ ne bie. Ŋaa ka Kūūlaŋ maŋ yeli ka o tage vooroŋ ka o sigi ka togitogi, ka o deɛ are beremm a maŋ gbeɛle a baala a wa yeli ka ''N naŋ daare maŋ yeli ka a ɛbaa, ka fo yeli ka dakpiri, zenɛ boŋ wa? Dagaaba naŋ maŋ yeli ka yɔŋmaa duoruŋ maŋ leɛ wa baare la a puliŋ, kyɛ lɛ la''

Zie na o naŋ na pɔge noba ka ba soŋ zɛle o ka o gaa ne o asibiti deɛ eɛ salmaa a nyegerɛ a wagere ŋa poɔ, ka noba na ne a o bidɔɔ naŋ da mogera ɔrebie kyɛ kora taa; ka ba zaa leɛ saseɛ a laare kyɛ bare o. Ŋaa ka o zɛle o pare o bɔgereŋ kyɛ ka Anaŋ-e tuuro faara kpɛlle bambambaŋ ka ba te kpɛ a asibiti.

Beri ayi, kyɛ ka a baala naŋ ba erɛ a eebo ka a nɛɛsere leɛre ba gaa ne asibiti yuo. A ta ba la kyuu gbuli ane daa gbuli kyɛ ka a baala na ba nyɛrɛ sammo. Ka a e kparaama ka a nɛɛsere leɛre ba gaa ne asibiti kpoŋi poɔ.

Ba naŋ wa ta a asibiti kpoŋi ŋa poɔ kyɛ a naŋ e ŋa ka va koni la ka ba neɛ a wagere na. A nɛɛsere da fereferɛ la a na baŋ bone na baaloŋ naŋ ferɛ o, o naŋ nyɛ a baaloŋ kyɛ a waaɛ zubieo bonso a dɔɔta na naŋ seŋ ka o saŋe a baaloŋ na gaa la nansaal paaloŋ a na leɛ wa daare ata poɔ.

Ŋaa ka ba maŋ de buuluŋ ane kõɔ zaa eŋe o nyobogriŋ ka a sigi o poɔ. A ne a lɛ zaa kyɛ a baala koŋ baŋ ūū o nimie a na wa yeli ka o voore fēē zaa.

Dare ata taɛ la ka a dɔɔta la wa kpɛ ka nɛɛsere taa o gaa ne te wuli a baala. O vɛŋɛɛ la ka ba zɛle o kpɛ ne die kaŋa poɔ ka o te ŋmɛ pĩĩme mine eŋ o paresɛgɛre ane o gɔɔ kpaŋkpaneŋ kyɛ de teenɛ mine eŋ o nyobogriŋ ka a na sigi o poɔ. Mitiri lezare ne pie poɔ la ka o leɛ gaa iri a nyobogriŋ boma bare ka baala la yuo o nimie a pãã baŋ zie na o naŋ be a wagere na, kyɛ naŋ tõɔ yeli yɛlɛ fēē.

Ŋaa ka dɔɔta moɔ nimiri eŋ o lɛɛŋ a saŋe o daa gbuli ne kyɛlee poɔ ka baala pãã baŋ zɛge o nu do ne o noɔre ka neɛzaa ba teɛ o ka o niŋe piili ŋmeɛrɛ pɛnnoo.

Kyuu gbuli a ne beri ata poɔ la ka a baala nyɛ sambo ka gabiri meŋ gaafera; a e o zaa gbeŋgbeŋgbeŋ a maŋ leɛrɛ yɛlɛ bara wolɛɛ wolɛɛ.

Ŋaa ka ba pãã kpɛ sane eŋ ne seɛ. Zie na ba naŋ na tu nyɛ libiri yɔɔ a sane na kyɛ ka dɔɔta ko ba vuo ka ba gaa yiri eɛ tuo. Ba zeŋ a diree demmo a boɔra sori na ba naŋ na tu a faare bamenne a asibitiŋ.

Saŋa na zaa a dɔɔta zeŋɛɛ a gado zu a kyɔgerɔ o taŋgaraa kyɛ kyɛlɛ a ba dɛmɛ na zaa. O wa zɛge la o zu a soore a baala ne Bɔrefɔ ka ziezaa ba la ɔɔrɔ o?  Fabaarekyi meŋ naŋ gaa sakuuri fēē o yeli ka yelfaa zaa ba la kyebe, kyɛ leɛ ka ona ane o dɔgereba la yele ba yɛlɛ.

Ba ba taa yelzaa na e a yɔɔ a sane ka Fabaarekyi da yeli ne ba teŋɛ kɔkɔre ka o saa leɛ gaa yiri te de o popo na o naŋ daare da a koɔre ka ba yɔɔ a sane. O naŋ yeli ŋaa la ka Anaŋ-e deɛ bare nentaŋ walewale lɛ.  Wagere na poɔ ka dɔɔta deɛ zeŋ fãã kyɛ nyɔge Anaŋ-e a bɔgela ka bare a koni.

Anaŋ-e bare la a koni kyɛ ka dɔɔta dɛne o kɔkɔre a yeli baaloŋ lɛ ko ba ka ba ta ferɛ bamenne a sane bonso ka o leɛ la sane zaa uuŋ teŋɛ ane a ba teŋɛ kɔkɔre. Wagere na ba zaa nɔɛ maaɛ ka ba zeŋe kpa nimie eŋ a dɔɔta a yi o naŋ yeli ba teŋɛ kɔkɔre.

Ŋaa ka a dɔɔta la dɛne o kɔkɔre kyɛ yeli ka ona Toor-laara la, Garapɔgere ane Konyãã bidɔɔ. Ka o asibiti kaŋa la a ŋa, kyɛ a kaŋa be la nasaal paaloŋ ka o maŋ gaa te saŋe baleba dare ayi zaa poɔ.

O noɔre teŋɛ leeboŋ ka nentaŋ suoro Fabaarekyi nyaa zaa aŋa ba-gbɛre, ka o deɛ lɔɔ kpɛlle bambambaŋ kyɛ yeli ka ''MAA DA BAŊ KOROŊ''.