Kūū voɔbo

Kūū voɔb; e la Dagaaba saakompare lisiri mine ba na maŋ tu ka dɔɔŋ wa kpi. Kyɛ dɔɔ la dɔɔ zaa naane ka ba maŋ tu ana yeltuure ama. Dɔɔ naŋ ta dɔɔ a kpi kǔūsoŋ la ka ba maŋ baŋ tu ana yeltuure ama. A la waana be meŋ , dɔɔ yoŋ la ka ba maŋ voɔ ba ba voɔrɔ pɔge. Dɔɔ tandɛre ba naŋ kɔɔ ba ba voɔrɔ o ka onaŋ daŋ wa gaa tambie kyeɛbo. Dɔɔ naŋ kpi pĩĩkūū aseŋ Baa naŋ nyɔge neɛ bee Saa naŋ ko neɛ ba ba voɔrɔ o . Ba ba voɔrɔ dɔɔlee meŋ azuiŋ dɔɔ naŋ zagi-zu a taa pɔge bee a gba ba taa la ka ba maŋ voɔ kyɛ a pãã maŋ yi la a bonirii zie. Dɔɔ naŋ ba taa pɔge, nɔdaa yoŋ la ka ba maŋ iri voɔ ne o. Pɔge tara, nɔdaa, bodaa amine kaŋa a eŋ baa. A baa wuli ka o soba di la zēɛ̃ bee ko la neɛ. Ba maŋ de la sɔdiraa ŋmaa gbere daadaa a donnezuri. Ba maŋ tonni la a nɔdaa zēē waare a dɔɔ tamma eŋɛ kyɛ laŋ nyɔge ne a tammo laŋ ne a piime kpare ne a nɔdaa zu a viire ne a kūū gbɛre kaŋa kyɛ luuri ne gbɛɛ bota. A bonzuuri zēē ba waara a kūū. A ama zaa eebo poɔ, a noba mine meŋ maŋ do be la a peɛzu a peɛlɛ ullee a te ta wagre na ba naŋ na baare. Kyɛ ka neɛ saaŋ ba daŋ kpi ka ba voɔ o sɛre, fo ba taa sori ka fo neɛ gbɛre a be poɔ.Kpeemɛ die bee kyaaraa poɔ la ka ba maŋ voɔ a kūū. Saabiiri la maŋ voɔ a kūū. Saabiiri la noba na yɛ ne ba naŋ maala taa yɛlɛ. Ka ba naŋ wa te baare a maale a nɛmɛ a wa ɔɔrɔ , kɔɔre kaŋa zaa ba seŋ ka o ŋmɛre a be; ka lɛ naane, yɛlɛ waɛ. Ka a Baa meŋ wa la, ba maŋ te dogle o la zie naŋ sɔgle ka onaŋ wa be ka ba pãã sɔgelɔ gɛrɛ ɔɔrɔ ; be poɔ la ka zēɛ̃diribe maŋ baŋ taaba . Lɛ la ka ba maŋ lɔɔ a lugi ka zēɛ̃baa maŋ be ka ba baŋ o ɔɔrɔ.