Duuyee tigri

Duuyee Tigri e la tigri na Daffiama deme naŋ maŋ di ba paaloŋ poɔ. Ba maŋ di o la Borenyɛ kyuu poɔ. Duuyee tigri e la tigri ba naŋ maŋ di a kare sefaare bare a teŋɛŋ kyɛ naŋ sɔre Ŋmene maaloo yi ba ŋmemɛ ne ba kpeene zie. Daffiama Naah paaloŋ deme zaa la maŋ di a tigri ŋa.

Lɛ Ba Naŋ Maŋ Di Duuyee Tigri. Sɛre ka a tigri na ta, a nembɛrɛ naŋ kaara a tigri yɛlɛ maŋ daŋ piili nara la a yeltuuri binne. Ba maŋ ŋma la sama ko taa kyɛ vɛŋ ka nabile zaa ne o yideme meŋ kyeɛre boma ba naŋ na de iri ba saama. A yi lɛ puoriŋ, ba maŋ iri la pɔlɔ ne sarre naŋ na soŋ a yel-erre zaa poɔ. Ka a beree wa ta, daagbuli ka ba maŋ de di neŋ a tigri kyɛ a yeltuuri viŋviŋ maŋ piili la Borenyɛ kyuu beri lezare ne anii. A bebiri ŋa ba maŋ piili ne la kyaakyare yeltɛɛtɛɛ poɔ teseŋ, bɔlŋmɛ, kuriwiri zɔŋgantaa, tama teɛbo ane a mine kaŋa.

Zie Naŋ Na Nyaa A Duuyee Tigri Boremyɛ kyuu dɔɔlezare ne pie la lɛ, a tenne zaa naŋ be a Daffiama Naah paaloŋ pɔgebilii ne sarre maŋ bu la tɛmpɛloŋ eŋ bonzagra poɔ a boɔrɔ a yie daŋgɔmɔ kyɛ keɛrɛ yiele sɔrɔ a ŋmemɛ ka a kare sefaare bare a yiri poɔ kyɛ wane laanfeɛ ne emmaaroŋ. Ba maŋ erɛ la lɛ kyɛ sɔrɔ bondirii yiri na zaa ba naŋ boɔre a tɛmpɛloŋ ka zimaane ka ba te maale siimaa di kyɛ de a kyɛlɛɛ te lɔɔ sapare seŋ ko a kpeemɛ ane a ŋmemɛ. Ŋaa la ka ba boɔlɔ yigoɔre bee Duuyee. Zie naŋ nyaa a Duuyee Tigri bebiri maŋ e la saama lantaa gyɛle yɛlɛ ne bondi bebiri. Noba yaga gaŋ a zaa Gɔmenɛnte tontoneba ne kpaŋkpiriŋmeɛreba ane saama aseŋ Namine maŋ kyeɛre la libie ko a paaloŋ deme, ka ba mine meŋ wane teŋyuo yɛlɛ a paaloŋ poɔ a seŋ, sakue. A tigri nyaazie naŋ e yuompaalaa maŋ e la bareka puoruu ko Naaŋmene. Ziyuo naŋ yi, Roman puoruu die la ka ba maŋ gaa ne kyɔɔtaare te kpɛ Mesa. A Duuyee Tigri baaroo la a lɛ.