Diteenɛ Dagaaba Poɔ

Ka Dagaabaŋ wa boɔrɔ bipɔge na ko ba bidɔɔ , noba mine bayi be la a bipɔge ŋa boɔbo poɔ ka ba boɔlɔ diteemɛ. Kaŋa maŋ yi la a bidɔɔ saa mine teŋa ka kaŋa meŋ yi a bipɔge saa yiri. Ba zaa maŋ e la a bidɔɔ saamine dɔgereba. A noba bama bayi la maŋ e a diteemɛ. Bana la maŋ teene a pɔge.

Boŋ la deteenoŋ? Diteenoŋ la noba bayi a bidɔɔ saamine nam maŋ kaa iri ka ba sage na di dããseɛ ko a bidɔɔ saamine a pɔgeboɔbo poɔ.

Aŋa manno. Donaalɛɛ nam be Nadoli, boɔrɔ la Dakpaalɛɛ nam be Tizza, poɔyaa ka ba ko ba bidɔɔ. A Donaalɛɛ na bɔ la ba areba bee ba yaŋaa nam ba e ba dindɔre bie ka o e a diteenɛ. A Donaalɛɛ na la gaa la a bipɔge saamine yiri Tizza poɔ te iri Donaalɛɛ areba bee yaŋaa ka o e a diteenɛ.

Diteenɛ toma la boŋ? Diteenɛ toma mine la ama.

Ona la maŋ de a o aremine bee sããkomine niŋe ka ba bɔ a pɔge.

Ona la na de a puoro bima ko a deɛmine.

Ona la na di dããseɛ bona zaa naŋ e a bipɔge boɔbo poɔ, aŋa a kyoore ane donne na zaa ba naŋ iri.

Ona la so ka o toŋ kuori gaa te ko a deɛmine.

Ka a pɔge na yi a leɛ kuli dɔɔ yuo a diteenɛ la maŋ di a sere-paaba boma leɛ ko a serekoriba,a o aremine.

Ka nɔkpeɛne wa kpɛ a serɛ ne o pɔge ka a ta ka a pɔge zo gaa o saa yiri te ziŋ a deteenɛ la maŋ lɔɔ tampɛloŋ ka pɔge leɛ gaa a o serɛ yiri.

A deteenɛ toma ama n nam mane kyaare la a deteenɛ nam be a bipɔge yiri.

A bidɔɔ deteenɛ toma ba e yaga.

O na di la dããseɛ ko bonna zaa naŋ e a pɔge boɔbo saŋ a deɛmine zie.

O toma la ka o tona koe korɔ a bipɔge saamine.

Ba maŋ ko la a deteenɛ kaŋa zaa nɔsaraa a toma zuiŋ.

.